انطباعك ايه عن الصعيد .. وناس الصعيد؟؟

انهارده أنا جايه وعايزه افضفض معاكم في موضوع كدا دايما بيواجهني في عالم النت وكمان لما بنزل القاهره أو الاسكندريه أو لما بطلع برا عن مجتمع الصعيد

طبعا أنا من مدينة ومحافظة سوهاج .. وأفتخر والله >>>وبحب مدينتي أوي زي ما كل واحد بينتمي لمدينته وبيحبها


ندخل في المفيد

للأسف الناس واخده فكره غريبه عن الصعيد وناسهم وفي كتير من الكلام ده غلط ميه في الميه ومن الممكن بل الأكيد إن الاعلام ليه دور كبير جدا في الكلام ده لأنه بيصور الصعيد غالباً بالتخلف والرجعيه حتى اللهجه والعادات وحاجات تاني كتير أوي أنا بقف قدامها مزهوله وأسأل نفسي احنا كدا ؟؟ وبزعل في نفسي لأننا مش كدا واللي بيزعلني أكتر لما أتكلم مع أي واحده وتلمحلي على ثقافتها دي ناحية الصعيد وناسها

أنا مش هتكلم عن مدن أو مراكز أو قرى بس هتكلم عن مدينتي واللي بعتز بيها وبناسها

في حاجات كتير بتعذبني لما بسمعها من بنات صحباتي وبيسألوا أسئله غريبه ودايما واخدين فكره اننا جامدين ولينا لهجه خشنه جدا "وه يابوي" لا على العكس خالص ناس جدعان جدا وطيبين وبصراحه برتاح جدا وأنا هنا أكتر من أني أسافر

وكمان الكتير بيفتكروا إن نسبة التعليم عندنا قليله جدا وماعندناش لا نوادي ولا مستشفيات ولا مدارس خاصه ولا لغات ولا ولا ولا ....

بالعكس عندنا المدارس وبكل المستويات اللغات والأرقم والخاص والحكومي والجامعه والمستشفيات والفنادق والنوادي والاستاد و المولات والحدائق والـــ.....

عاديين جدا وناس طبيعيين جدا وناس كتير هتلاقيها من الصعيد ناجحه جدا ووصل صوتها برا وكبرت وحققت أهدافها واشتهرت وناس مثقفه جدا ومتعلمه بشكل راقي ومستويات هايله وهتلاقوا على فكره أعلام كتير ومشاهير من الصعيد .......


..... من النهايه كل اللي بتمناه من ورا الموضوع ده ان الناس تفهم صح ووجهة نظرها عن الصعيد يا ريت تتغير شويه لأننا مش كدا >>> أيوه مش زي ماصورونا في عسكر في المعسكر ولا امرأه من الصعيد الجواني ولا قلب حبيبه ولا ولا ولا .... احنا مش كدا بجد

>>>>>>>>>>>>>>>>>>>>>>>>>>>>>>



.
.
.

بس كدا ده اللي كان في نفسي

تحيتي للجميع